उर्दू शाळांतील शिक्षकांची कमतरता दूर करा; आमदार अमोल पाटील यांना निवेदन

प्रतिनिधी / नुरुद्दीन मुल्लाजी

कासोदा येथील उर्दू प्राथमिक शाळांमध्ये शिक्षकांची मोठ्या प्रमाणात कमतरता असल्याने विद्यार्थ्यांच्या शैक्षणिक गुणवत्तेवर परिणाम होत असल्याची बाब समोर आली आहे. कासोदा परिसरातील चार उर्दू प्राथमिक शाळांमध्ये प्रत्येकी सुमारे चार शिक्षकांची कमतरता असून, एकूण १६ शिक्षकांची आवश्यकता असल्याने विद्यार्थ्यांचे शैक्षणिक नुकसान होत असल्याचे निवेदनात नमूद करण्यात आले आहे.

शाळांमध्ये विद्यार्थ्यांची संख्या लक्षात घेता आवश्यक संख्येने शिक्षक उपलब्ध नसल्यामुळे विद्यमान शिक्षकांवर अध्यापनाचा अतिरिक्त भार पडत आहे. त्यामुळे विद्यार्थ्यांना नियमित व गुणवत्तापूर्ण शिक्षण देताना अडचणी निर्माण होत असून, त्यांच्या शैक्षणिक प्रगतीवरही परिणाम होण्याची शक्यता व्यक्त करण्यात आली आहे.

या गंभीर समस्येकडे लक्ष वेधण्यासाठी जुल्फिकार अली, बिलाल काजी आणि इमरान मुजावर यांनी आमदार अमोल पाटील यांची भेट घेऊन शिक्षकांची कमतरता तातडीने दूर करण्याची मागणी करणारे निवेदन दिले.

यावेळी आमदार अमोल पाटील यांनी तत्काळ जळगाव येथील शिक्षणाधिकाऱ्यांशी दूरध्वनीवरून संपर्क साधून कासोदा येथील उर्दू प्राथमिक शाळांमधील शिक्षकांची कमतरता दूर करण्याबाबत सूचना केल्या. शिक्षणाधिकाऱ्यांनीही या समस्येकडे लक्ष देऊन आवश्यक कार्यवाही करण्याची ग्वाही दिली.

उर्दू प्राथमिक शाळांमधील रिक्त पदे तातडीने भरून विद्यार्थ्यांना पुरेसे व गुणवत्तापूर्ण शिक्षण उपलब्ध करून द्यावे आणि विद्यार्थ्यांचे होणारे शैक्षणिक नुकसान थांबवावे, अशी मागणी निवेदनाद्वारे करण्यात आली आहे.

दरम्यान, शिक्षकांची कमतरता लवकरात लवकर दूर करून विद्यार्थ्यांच्या शैक्षणिक हितासाठी प्रशासनाने सकारात्मक निर्णय घ्यावा, अशी अपेक्षा पालक व नागरिकांकडून व्यक्त होत आहे.