चाळीसगावात दहीहंडीचा जल्लोष; उन्मेशदादांनी धरला डीजेच्या तालावर ठेका

सहा गोविंदा पथकांचा सहभाग; श्रीराम गोविंदा पथक टाकळी ओझर प्रथम, जिद्दी ग्रुप चाळीसगाव द्वितीय

चाळीसगाव : शिवसेना, युवासेना व माजी खासदार उन्मेशदादा पाटील मित्र परिवाराच्या वतीने आयोजित करण्यात आलेल्या भव्य दहीहंडी उत्सवाचा कार्यक्रम काल मोठ्या उत्साहात, जल्लोषात आणि चाळीसगावकरांच्या उत्स्फूर्त प्रतिसादात संपन्न झाला. दहीहंडी उत्सवाच्या निमित्ताने शहरात दिवसभर उत्साहाचे वातावरण पाहायला मिळाले.

यावेळी सामाजिक व धार्मिक सलोख्याचा संदेश यातून देण्यात आला

केवळ एक सण म्हणून नव्हे, तर तालुक्यातील सर्व धर्मीय आणि सर्व घटकांना एकत्र आणणारे व्यासपीठ म्हणून या दहीहंडीचे आयोजन करण्यात आले होते.

कार्यक्रमाच्या सुरुवातीस माजी आमदार स्व. राजीवदादा देशमुख यांना भावपूर्ण आदरांजली अर्पण करण्यात आली. त्यांच्या स्मृतींना अभिवादन करून दहीहंडी उत्सवाला सुरुवात करण्यात आली. यावेळी उपस्थितांनी स्व. राजीवदादा देशमुख यांच्या कार्याचे स्मरण करत त्यांना श्रद्धांजली वाहिली.

या दहीहंडी उत्सवात एकूण सहा गोविंदा पथकांनी सहभाग नोंदविला. दहीहंडी फोडण्यासाठी प्रत्येक पथकाने मोठ्या उत्साहाने आणि जोमाने प्रयत्न केले. एकापेक्षा एक सरस मानवी मनोरे उभारत गोविंदांनी उपस्थितांची मने जिंकली. पथकांच्या थरारक कामगिरीमुळे कार्यक्रमस्थळी उत्साहाचे वातावरण निर्माण झाले होते.

*प्रथम क्रमांकाला ₹१,११,१११ चे बक्षीस*

दहीहंडी उत्सवासाठी आयोजकांच्या वतीने आकर्षक बक्षिसांची घोषणा करण्यात आली होती. प्रथम क्रमांकासाठी तब्बल ₹१,११,१११, तर द्वितीय क्रमांकासाठी ₹५१,१११ रुपयांचे बक्षीस ठेवण्यात आले होते.

अखेर दमदार कामगिरीच्या जोरावर श्रीराम गोविंदा पथक, टाकळी ओझर यांनी प्रथम क्रमांक पटकावत ₹१,११,१११ रुपयांचे बक्षीस मिळवले. तर जिद्दी ग्रुप, चाळीसगाव यांनी द्वितीय क्रमांक पटकावत ₹५१,१११ रुपयांचे बक्षीस आपल्या नावावर केले.

विजेत्या गोविंदा पथकांचे उपस्थित मान्यवरांच्या हस्ते अभिनंदन करण्यात आले. पथकांच्या उत्कृष्ट कामगिरीचे उपस्थितांनी टाळ्यांच्या कडकडाटात कौतुक केले.

उन्मेशदादांनी धरला डीजेच्या तालावर ठेका

कार्यक्रमाचे आणखी एक प्रमुख आकर्षण ठरले ते म्हणजे माजी खासदार उन्मेशदादा पाटील यांचा उत्स्फूर्त सहभाग. दहीहंडीच्या उत्साहात सहभागी होत उन्मेशदादा पाटील यांनी डीजेच्या गाण्यांवर ठेका धरत उपस्थित तरुणाईचा उत्साह वाढवला.

उन्मेशदादा पाटील यांनी डान्स करताच उपस्थित तरुणाईने मोठा जल्लोष केला. डीजेचा दणदणाट, टाळ्यांचा कडकडाट आणि नागरिकांचा उत्साह यामुळे कार्यक्रमस्थळी उत्साहाला उधाण आले होते.

पत्रकार व पोलीस बांधवांचे मोलाचे सहकार्य

या भव्य दहीहंडी उत्सवाच्या यशस्वी आयोजनासाठी पत्रकार बांधव तसेच पोलीस बांधवांचेही मोठे आणि मोलाचे सहकार्य लाभले. कार्यक्रमाची माहिती नागरिकांपर्यंत पोहोचविण्यापासून ते कार्यक्रमाचे वार्तांकन करण्यापर्यंत पत्रकार बांधवांनी महत्त्वाची भूमिका बजावली.

तसेच दहीहंडी उत्सव शांततेत आणि सुरळीत पार पडावा, यासाठी पोलीस बांधवांनी चोख बंदोबस्त ठेवत कायदा व सुव्यवस्था राखण्यासाठी सहकार्य केले. त्यांच्या सहकार्यामुळे कार्यक्रम उत्साहपूर्ण वातावरणात पार पडला.

चाळीसगावकरांची मोठी उपस्थिती

दहीहंडी उत्सवाला चाळीसगाव शहरासह परिसरातील नागरिकांनी मोठ्या संख्येने उपस्थिती लावली. महिला, युवक तसेच विविध वयोगटातील नागरिकांनी दहीहंडीचा थरार अनुभवला. गोविंदा पथकांच्या प्रत्येक थराला उपस्थितांकडून उत्स्फूर्त प्रतिसाद मिळत होता.

ढोल-ताशांचा गजर, डीजेचा दणदणाट, गोविंदा पथकांचा थरार आणि नागरिकांचा जल्लोष यामुळे संपूर्ण परिसर दहीहंडीमय झाला होता. शिवसेना, युवासेना व माजी खासदार उन्मेशदादा पाटील मित्र परिवाराच्या वतीने आयोजित करण्यात आलेल्या या भव्य दहीहंडी उत्सवाने चाळीसगावकरांना उत्साह आणि जल्लोषाचा अविस्मरणीय अनुभव दिला.